Солтия фирқаси
Мазкур фирқа хавориж фирқасининг ажорида туркумидан бўлиб, унга Сот ибн Усмон (бир рвоятда Солт ибн Абу Солт) асос солган.
Бу фирқадагиларнинг фикрича инсон фитрат вақтида (яъни туғилганида) мусулмон бўлмайди. Қачонки, бола балоғатга етса унга ўзлари тушунган Исломни даъват этишади, қабул қилса уни ўз сафларига қабул қилишади, бўлмаса йўқ.
Ўз сафларига биров келиб қўшилса ва исломни қабул қилса уни қабул қилишар, у улар учун биродарга айланар ва ўз сафларига қўшиб олишар эди. Унинг фарзандлари балоғатга етмаган бўлса уни мусулмон деб билишмас ва сафларига қўшмас эдилар.
Улар бунақа тушунчани хаворижларнинг Саолиб ва Ажорида фирқаларидан олганлар. Бу икки фирқаларнинг даъволари қуйидагилардан иборат бўлган:
“Кофирларнинг гўдаклари ҳам, мусулмонларнинг гўдаклари ҳам биз учун биродар ҳам, душман ҳам эмасдирлар. Улар билан орамизда бароат(яъни, ора очиқлик) ҳам йўқдир. Қачон балоғатга етсалар, исломга даъват қилинадилар, қабул қилсалар иқрор бўлинади, инкор этсалар йўқ.”
Уларнинг бу тушунчалари Аҳлис Сунна вал Жамоанинг ақийдасига зиддир. Чунки Расулуллоҳ саллоллоҳу алайҳи васаллам бундай марҳамат қилганлар:
رسول الله صلى الله عليه وسلم أنه قال عن
(مَا مِنْ مَوْلُودٍ إِلاَّ يُولَدُ عَلَى الْفِطْرَةِ، فَأَبَوَاهُ يُهَوِّدَانِهِ أَوْ يُنَصِّرَانِهِ أَوْ يُمَجِّسَانِهِ)،
روى البخاري في صحيحه
“Ҳар бир туғилган бола фитратда(яъни, мусулмон бўлиб) туғилади. Кейин унинг ота –онаси уни ё яҳудий ё насроний ё мажусий қилиб қўядилар”.