Бугунги куз фаслида кўчат экиб, кўкаламзорлаштириш муҳим ишлардандир. Деҳқонларимиз тажрибасига кўра куз фаслида экилган дарахт кўчатлари бехато кўкариб, ўзининг яхши самарасини беради. Шу туфайли бугунги куз фасли кунларини ғанимат билиб, имкони борича кўчат экишга аҳамият берайлик.
Албатта, дарахт кўчати экишда катта савоб бор. Бу ҳақда жаноб Пайғамбаримиз (с.а.в.) шундай марҳамат қилганлар: “Агар бир банда кўчат ўтказса ёки экин экса, ундан қушми, инсонми ёки ҳайвонми еса, бунинг учун унга садақа (қилганлик савоби) бўлади” (Муслим ривояти).
Дарҳақиқат, юртимизда кўкаламзор жойлар кўпайса ҳамма жиҳатдан яхши бўлади. Кўкаламзор жойга кўз тушиши билан одамнинг кўнгли равшан тортади. Юртимизда кўкаламзор жойлар кўпайсин. Шу билан бирга кўчат экиш билан инсон ўзидан кейин садақаи жория қилган бўлади. Садақаи жориядан эса инсонга то қиёматгача савоб етиб боради. Бу ҳақда ҳам Пайғамбаримиз (с.а.в.) “Агар бирор банда бирон кўчат экадиган бўлса, ундан инсон, ҳайвон ёки қуш еса, бу ўша бандага қиёмат кунигача садақаи жория бўлади”, дейилган (Муслим ривояти).
Келинг, кўчат экиб боғ қилайлик!
Р. Акбаров,
ЎМИнинг Қашқадарё вилоятдаги вакиллик ходими