Бисмиллаҳир роҳманир роҳим
Ватанга меҳр, аввало, инсоннинг ўз оиласи, уйи, маҳалласи ҳамда туғилиб ўсган юртига муҳаббатдир. Ватанга муҳаббат юксак инсоний фазилатлардан экани кўп зикр этилади. Бу ҳақда “Ватанни севмоқ имондандир”, дейилган ҳикматни эсга олиш кифоядир.
Қадимдан ўзбек халқи мамлакат манфаатларига хиёнат килишни, ўз шахсий манфаатларини кўзлаб иқтисодий, сиёсий ва бошқа жосуслик фаолияти билан шуғулланишни, душман томонига ўтиб ўз халқи, мамлакатига қарши кураш олиб боришни, қўпорувчилик ишлари билан шуғулланишни, турли мутаассиб ва экстремистик ғоялар таъсири остида оиласи ва Ватанидан воз кечишни, киндик қони тўкилган заминга нисбатан бўҳтон ва иғво тарқатиш ва ҳоказоларни қоралаб келган.
Ислом таълимотида Ватанга хиёнат қаттиқ қораланади. Ибн Умар розийаллоҳу анҳумо ривоят қилади: «Мен Расулуллоҳ соллаллоҳу алайҳи ва салламнинг: “Қиёмат куни ҳар бир хиёнаткор учун бу дунёда қилган хоинлиги учун шармисор қилувчи байроқ ўрнатиб қўйилади”, деганларини эшитдим» (Имом Бухорий, 3188-ҳадис).
Ватанга хоинликни ҳеч қандай диний ва дунёвий қонун ёки таълимот оқламайди. Она-Ватан ҳеч қачон сотилмайди ва унга хиёнат қилинмайди.
Донишмандлар айтишган: Тўрт нарса сотилмайди: инсоннинг дини, иймони, танаси ва Ватани. Кимда ким ушбу қоидага риоя қилмас экан, у инсонийлик чегарасидан чиққан ҳисобланади. Алихонтўра Соғуний ҳазратлари “Биздан эмасдурлар Ватанни севмаганлар” деб бежизга айтмаганлар, чунки яқин ўтмишимизда Ватанимизни ёв қўлига ўтиши, халқимизга қул муомаласи қилинишининг асосий сабаби Ватанига, динига хоинлик қилиш, ўз бурчига масъулиятсизлик билан ёндашиш, ҳам моддий, ҳам маънавий тараққиётдан орқада қолиш оқибатида бўлганлигини ҳеч қачон унутмаслигимиз ва бу хатони қайта такрорламаслигимиз зарур.
Шундай экан, барчамиз биргаликда она-Ватанимизда тинчлик ва осойишталикни таъминлаш, уни асраб-авайлаш, ҳимоя қилиш каби фуқаролик бурчимизни астойдил бажарайлик, мустаҳкам иродамиз, дину диёнатимиз билан бутун жамиятимизда барқарорлик ва соғлом муҳитни мустаҳкамлаб, тинч-осуда ҳаётимизни, муқаддас динимиз поклигини таъминлашда собит қадам бўлайлик!
Алимардон Кароматов, “Хожа Бухорий” ўрта махсус ислом билим юрти талабаси