Жонажон диёримиз Ўзбекистондан чиқиб чет элга ўқиш бордик. Ватанимиздан йироқда яъни мусофирликда инсон кўп воқеаларни бошидан ўтказар экан. Шу сабабли халқимиз “ Мусофир бўлмагунча мусулмон бўлмайди “ деб бежизга айтмас экан.
Рамазон ойи кириб келганида ётоқхонамиз ошхонасига кимдир озиқ-овқатларни билдирмасдан қўйиб кета бошлади. Бир куни бу озиқ-овқатларни ким ва нима сабабдан ташлаб кетаётганлигини билмоқчи бўлдик. Ҳар кунгидан ётоқхонага эртачироқ қайтдик. Ётоқхона ошхонасини кузатиб турдик. Бир оздан сўнг бир киши икки қўлида озиқ-овқатлар солинган сўмкаларни кўтариб келди. Ошхонанинг овқатланадиган столи устига уларни қўйиб чиқиб кета бошлади. Биз эса унинг орқасидан тушдик. У кўча бўйлаб юриб баланд “ Супер макет ” дўконга кириб кета бошлади. Мен уни йўқотиб қўйишдан хавфсираб, орқасидан етиб олдим ва унга:
-Ассалому-алайкум – дедим.
-Ва алайкумуссалом- деди
-Сиз кимсиз? –дедим.
-Мен шу “ Супер макет” дўконининг эгасиман - деди.
-Сиз бизнинг ётоқхонамиз ошхонасига озиқ-овқат олиб бориб қўяётган экансиз, сизнинг мол-мулкингиз яна кўпайсин –дедим.
- Йўқ, йўқ, бундай дуо қилма. Менга Аллоҳ таоло мол-мулкни шундай ҳам кўп берган, мен шу пайтгача менга берилган неъматларни шукронасини тўлиқ адо қилаолганим йўқ. Мен сизларга озиқ-овқат элтиб бераётган бўлсам, уларни мен берамаяпман. Уларни сизга менинг қўлим билан Аллоҳ бераяпти. Мендан эмас, Аллоҳдан миннатдор бўл- деди.
У гапим тугади дегандек, қўлини юқори кўтарди ва олдинга қараб юриб кетди. Мен эса унинг сўзларидан томоғимга бир нарса тиқилиб, бир оз ўша жойда туриб қолдим.
Қарши туман “ Акбар халифа эшон ибн Мухтор” масжиди имом хатиби Руҳиддин Акбаров. “ Ислом Нури” газетаси. 2019. 11-сони.