Инсон ҳаётида энг катта бойлик — бу вақт ва тинчликдир. Кўпинча биз келажак ҳақида қайғурамиз ёки ўтмишдаги хатоларни ўйлаб афсусланамиз. Аммо шу оралиқда қўлимизда бор энг қиммат неъмат — бугунги кунни унутиб қўямиз. Аслида эса бугун бор бўлган нарсаларимиз учун шукр қилиш ҳаётимизни янада мазмунли қилади.
Бугун уйғондикми — демак ҳаёт бор. Соғлиғимиз жойидами — бу катта неъмат. Оиламиз, яқинларимиз, бир бурда нон, бошимиз устида том бор экан — буларнинг ҳар бири шукрга арзийди. Ҳар кимнинг дарди, ташвиши бор, лекин бор неъматларга назар ташласак, қалбимизда хотиржамлик пайдо бўлади.
Шукр қилиш инсонни руҳан кучли қилади. У сабрни, қаноатни ва умидни оширади. Шукрли инсон ҳаётга ижобий қарашни ўрганади, қийинчиликларни эса сабоқ сифатида қабул қилади. Бугунги кунга шукр қилган одам эртанги кунга ҳам ишонч билан қарайди.
Хулоса қилиб айтганда, бахт катта нарсаларда эмас, балки ҳар куни биз билан бирга бўлган оддий неъматлардадир. Шунинг учун ҳам бугунги кунимизга шукр қилишни унутмайлик. Чунки айнан бугун — ҳаётимизни ўзгартириш, яхшилик қилиш ва бахтни ҳис этиш учун берилган энг қиммат имкониятдир.
Алимардон КАРОМАТОВ,
Китоб туман “Шайхон” жоме масжиди имом-ноиби