Мустақиллик — миллатнинг эркин ва фаровон ҳаёт қуриши, миллий қадриятлари, тили, дини, тарихи ва маънавий меросини асраб-авайлаши учун берилган буюк неъматдир.
Бу йил жонажон Ўзбекистонимиз давлат мустақиллигининг 35 йиллигини катта шоду хуррамлик билан қарши олмоқда. Истиқлолнинг ушбу қутлуғ санаси «Ягона Ватан, ягона халқ бўлиб, янги ҳаёт ва келажак яратамиз!» деган эзгу ғоя асосида кенг нишонланмоқда.
Ўтган 35 йилга назар ташлар эканмиз, мустақиллик халқимиз ҳаётида қанчалик улкан ўзгаришлар ясаганининг гувоҳи бўламиз. Энг муҳими, биз ўзлигимизни англадик. Миллий ва диний қадриятларимизга бўлган муносабат тубдан ўзгарди. Буюк аждодларимиз — Имом Бухорий, Имом Термизий, Имом Мотуридий, Бурҳониддин Марғиноний каби алломаларимизнинг илмий-маънавий меросини чуқур ўрганиш, уларнинг асарларини халқимизга етказиш учун кенг имкониятлар яратилди.
Бугун юртимизда масжидларимиз обод, Қуръони карим ва диний-маърифий китобларни ўрганиш, илм аҳлини эъзозлаш, ёшларни маърифатга чорлаш учун муносиб шароитлар мавжуд. Бу имкониятларнинг барчаси тинчлик ва барқарорлик билан чамбарчас боғлиқ.
Зеро, тинчлик бор жойда тараққиёт бўлади. Тинчлик бор жойда илм-маърифат ривожланади. Тинчлик бор жойда инсон ўзининг ва фарзандларининг келажагини хотиржам ўйлайди. Шу боис мустақилликни асраш, аввало, тинчлик ва осойишталикни асрашдан бошланади.
Динимизда тинчлик ва осойишталикка алоҳида эътибор қаратилган. Инсонлар ўртасида меҳр-оқибат, ўзаро ҳурмат ва ҳамжиҳатликни қарор топтириш мўминнинг муҳим фазилатларидан саналади.
Бугун биз юртимиздаги тинч ҳаётнинг қадрига етишимиз керак. Чунки дунёда турли зиддиятлар, уруш ва нотинчликлар давом этаётган бир пайтда осойишта юртда яшаётганимиз Яратганнинг буюк неъматидир.
Шунинг учун ҳам ҳар биримиз Ватанимиз тинчлигига дахлдор эканимизни ҳис қилишимиз лозим. Бир оғиз ширин сўз билан ҳам, фарзанд тарбияси билан ҳам, ҳалол меҳнат билан ҳам, жамият манфаатига хизмат қиладиган эзгу ишлар билан ҳам юрт тинчлигига ҳисса қўшиш мумкин.
Айниқса, имом-хатиблар зиммасидаги масъулият бу борада ниҳоятда катта. Минбар — фақат диний масалалар тушунтириладиган жой эмас. У ердан одамларни эзгуликка, бирдамликка, оила муқаддаслигини асрашга, Ватанни севишга, илм олишга, ёмон иллатлардан узоқ бўлишга чақириқлар янграйди.
Қашқадарё вилоятида фаолият олиб бораётган имом-хатиб ва имом ноиблари ҳам ана шу эзгу вазифани сидқидилдан адо этишга ҳаракат қилмоқда. Вилоятда диний-маърифий тадбирлар, ёшлар билан учрашувлар, аҳоли ўртасида маънавий-маърифий суҳбатлар мунтазам ташкил этилмоқда. Шунингдек, мустақилликнинг 35 йиллиги муносабати билан диний соҳа ходимлари иштирокида турли маърифий ва миллий қадриятларга асосланган тадбирлар ўтказилмоқда.
Воҳамиз аҳолиси азалдан меҳмондўстлик, саховат, мардлик, оқибат ва ҳамжиҳатлик каби фазилатлари билан танилган. Бугун ҳам бу қадриятлар халқимиз ҳаётида ўзининг муносиб ифодасини топмоқда. Мустақиллик бизга ана шу миллий фазилатларни янги мазмун билан бойитиш имконини берди. Маҳаллалардаги бирдамлик, эҳтиёжманд инсонларни қўллаб-қувватлаш, кексалар ҳолидан хабар олиш, етим-есирлар ва ижтимоий ҳимояга муҳтож оилаларга кўмак бериш каби ишлар халқимизнинг азалий эзгу анъаналари билан уйғунлашиб кетган.
Ўзбекистон мусулмонлари идорасининг Қашқадарё вилоятидаги вакиллиги томонидан ҳам ана шу хайрли ишларга муносиб ҳисса қўшишга алоҳида эътибор қаратилмоқда. Мустақиллик байрами арафасида эҳтиёжманд оилалар ҳолидан хабар олиш, уларга моддий ва маънавий кўмак кўрсатиш каби хайрли ташаббуслар амалга оширилаётгани ҳам халқимизга хос меҳр-оқибатнинг амалий ифодасидир.
Таъкидлаш жоизки, бугунги ёшлар — эртанги Ўзбекистоннинг эгалари. Шунинг учун уларнинг таълим-тарбияси, дунёқараши, маънавий камолоти барчамизнинг энг муҳим вазифаларимиздан биридир.
Ёш авлодга мустақилликнинг қадрини тушунтириш, уларни Ватанга садоқатли, билимли, ҳалол ва меҳнатсевар инсонлар қилиб тарбиялашда оила, маҳалла, таълим муассасалари ва диний соҳа вакилларининг ҳамкорлиги муҳим аҳамият касб этади.
Бугун ахборот макони ниҳоятда кенгайган. Ёшлар турли манбалардан ҳар хил маълумотларни қабул қилмоқда. Бундай шароитда уларга тўғри йўл кўрсатиш, соғлом ақида ва тўғри дунёқарашни шакллантириш, ёт ва бузғунчи ғоялар таъсиридан асраш учун аввало уларнинг ишончини қозониш, улар билан самимий мулоқот қилиш зарур.
Илмли, маърифатли ва мустақил фикрлайдиган ёш — Ватаннинг энг катта бойлигидир. Шу маънода, мустақилликнинг 35 йиллиги биз, катталарга ҳам улкан масъулият юклайди: биз ёшларга қандай Ватанни қолдиряпмиз? Уларга қандай қадриятларни мерос қилиб беряпмиз? Фарзандларимиз биздан нимани ўрганмоқда? Бу саволларга ҳар биримиз ўз ҳаётимиз, меҳнатимиз ва тарбиямиз билан жавоб беришимиз керак.
Мустақиллик байрами — фақат тантана ва шодлик куни эмас. Бу кун биз учун шукр ва тафаккур куни ҳамдир.
Биз бугунги тинч ва осойишта ҳаётимиз учун шукр қилиш билан бирга, унинг қадрига етишимиз лозим. Ватан равнақига ўз ҳиссамизни қўшиш, ҳалол меҳнат қилиш, оиламиз тинчлигини асраш, фарзандларимизни яхши инсон қилиб тарбиялаш — мустақиллик олдидаги энг муносиб бурчларимиздандир.
Мустақилликни севиш — Ватанни севишдир. Ватанни севиш эса унинг равнақи учун амалий ҳаракат қилишдир. Бугун ҳар бир соҳада меҳнат қилаётган инсоннинг ўз вазифаси бор. Деҳқон ерга уруғ қадаб, тадбиркор янги иш ўринлари яратиб, устоз ёшларга таълим бериб, шифокор инсон саломатлигини асраб, имом-хатиб эса халқни эзгулик ва маърифатга чорлаб, юрт тараққиётига ўз ҳиссасини қўшади.
Шу жиҳатдан қараганда, мамлакатимиздаги ҳар бир ҳалол меҳнат мустақилликни мустаҳкамлашга қўшилган ҳиссадир.
Азиз юртдошлар!
Мустақиллигимизнинг 35 йиллиги барчамизга муборак бўлсин!
Аллоҳ таолодан юртимиз тинчлигини, халқимиз осойишталигини, хонадонларимиз файзу баракасини, фарзандларимиз камолини сўраб дуо қиламиз.
Яратган эгамиз Ўзбекистонимизни ҳар қандай офат ва балолардан асрасин! Юртимизнинг осмони ҳамиша мусаффо, халқимизнинг қалби хотиржам бўлсин. Ватанимиз тараққиёти, халқимиз фаровонлиги ва юртимиздаги тинчлик-осойишталик бардавом бўлсин!
Раҳматилло Усмонов,
ЎМИнинг Қашқадарё вилоятидаги вакили, вилоят бош имом-хатиби