РАМАЗОН – РАҲМАТ ОЙИ
4629
25-04-2021, 11:50
536
Ўқиш режими
+
-

Рамазон ойи меҳр-шафқат, хайр-саховат, сабр-қаноат, мурувват ва шукроналик рамзидир. Бу ой маънавий-руҳий ҳаётимизда муносиб ўринга эга бўлиб, мусулмон ўлкаларда алоҳида аҳамият касб этади.
Дарҳақиқат, жамиятда меҳр-оқибат, ўзаро ҳурмат ва ҳамжиҳатлик ришталарини мустаҳкамлаш учун айни фурсат келди. Хайр-эҳсон, яхшилик ва олийжаноблик кўрсатиладиган ойда бошқа ойлардагига қараганда янада кўпроқ Қуръони карим ўқилади, зикр-тасбеҳ айтилади, соғлик-саломатлик, тинч-осойишталикни сўраб дуолар қилинади.
Саховатпеша кишиларимиз савоб олиш умидида эҳтиёжмандларга, етим-есирларга, кам таъминланган оилаларга меҳр-мурувват кўрсатадилар. Ҳар бир рўзадор киши оиласи бағрида, ифтор дастурхони атрофида йиғилиб, бир-бирларини хушнуд этадилар. Бу билан зиммамиздаги фарз адо бўлади, қолаверса, ваъда қилинган ажрлар қўлга киритилади.
Қуръони карим нозил бўлган бу фазилатли ойда юраклар юмшайди, ғам-ғуссалар кетади, гина-кудуратлар унутилади. Рўзадорларга жаннат эшиклари очилиб, жаҳаннам дарвозалари ёпилади. Раҳмат эшикларидан файз-барака ва илоҳий раҳмат ёғилади. Қуръони карим тиловатларидан қалблар қувват олади. Шайтонлар кишанланиб, нафслар жиловланади. Шу сабаб фикрлар тиниқлашиб, яхшиликлар кўпайиб, кўнгиллар равшан бўлади.
Рамазон бир ой давом этадиган байрам. Алқисса, гуноҳларнинг кечирилиши учун зўр имконият демакдир. Бу баракали ойнинг ҳар лаҳзасини ғанимат билиб, қадрига етайлик. Саҳарлик ва ифторликларда, таровеҳ ва хатми Қуръонларда элимизнинг фаровонлиги, юртимизнинг тинчлиги ва тараққиёти, фарзандларимизнинг камолотини сўраб дуо қилайлик. Аллоҳнинг суйган бандалари қаторида бўлиб, жаннатнинг рўзадорлар учун ваъда қилинган Райён («чанқоқбосди») эшигидан кириш бахтига муяссар айлашини сўрайлик.
ЭРКИН ҚУДРАТУЛЛОҲ
БЕКМУРОД САХРИЕВ